Une honetan Arkeolanen datu-basean jasotako beste laginekin ari gara konparazioak egiten, sinkronizazio berriak aurkitzeko xedean. Laginok, aurtengo urteari begira programatutako laginketetatik jasotzen direnekin batera, data ezezaguneko egituren datazio berriak zehazteko aukera emango dute, euren bilduma aberasteko balioko dute eta, honenbestez, datatzeko tresna gisa duten ahalmena emendatuko dute. 

Klimaren nondik norakoak aztertzeko lanak (ikerketa-lan hauetan batera aztertzen dira hazkunde serieak eta metereologia datuak hazkundean eragin handieneko klima-faktorea isolatzeko eta, honenbestez, eraztunen zabaleratik abiatuta iraganeko klimaren berri izateko) kurbara lagin berriak jasotzeko aukera guztiak agortzen direnean egingo dira, zenbait epetan duen isla artean ez baita behar bestekoa hazkundearen eta klima-faktore garrantzitsuaren arteko koantifikazioa zehazteko. 

Iraganeko klimari buruzko datu puntualei dagokienez, oraingoz urte esanguratsuak, maiztasuna eta eratxikiriko balizko fenomenoak hautemateko azterketak baizik ez dira egin. 

Ondoko grafiko honetan zehazten dira azken hirurehun urteko epeari begira jasotako datuak:

Urte esanguratsuen maiztasunaren bilakaera hamarraldien arabera

Urte hauetako maiztasunaren azterketa, zuhaitz gehienek hazkunde “bereziki” handia edo txikia erakusten baitute, eta sarri askotan muntako klima fenomenoei lotuak baitira, oso garrantzitsua da kliman izandako aldaketen adierazlea baita; hau da, epe kronologiko jakin batean urte hauen proportzio handiagoa hautematen bada, epe horretan klimak aldaketa handiagoak izan dituelako seinale da.

Urte hauetako klima fenomenoak toki edo eskualde mailakoak izan daitezke, 1919an penintsularen iparraldean eragin zuen hotz eta ekaitz boladak esaterako –zuhaitzak oso-oso gutxi hazi ziren– edo 1942. urtean erregistraturiko idorte luzea, hurrengo urtean zuhaitzak oso-oso gutxi hazi baitziren ondorioz.

Munta handiagoko beste fenomeno batzuk ere harremanetan jarri dira serie dendrokronologietako urte esanguratsuekin. Halatan, 1815. urtean Indonesiako Tambora sumendiko erupzioak mundu mailan izan zituen ondorioak, “udarik gabeko urtea” deitua eragin zuen, eta mundu osoko zuhaitzak gutxi hazi ziren. Antzeko zerbait gertatu zen Nikaraguako Coseguina sumendia 1835ean lanean hasi zenean; hurrengo hiru urteetan tenperaturek behera egin zuten kolpean, eta tarte horretan erregistratutako hazkundeak minimoak izan ziren. Beste kasu batzuetan, zuhaitzen eraztunen zabalera txikienen erregistroak mundu mailako hotz boladekin jartzen dira harremanetan, 1878-1879 urteetan bezala, edo ozeanoetako korronteen zirkulazioarekin lotutako fenomenoekin jartzen dira harremanetan, Niño deitutako kasuan esaterako; kasu honetan 1982-1986 epean hazkunde nabaria islatzen da, azterketa askotan hauteman zen bezala, eta berriro ere, kasu honetan islatua.

Aurreko grafikoa aztertuta ondorioztatzen da XX. mendeko azken herenera biltzen dela azken hirurehun urteetako urte esanguratsu hauen proportziorik handiena. Datu hau berretsi egiten dute laborategi honek Gipuzkoako haritzekin egindako antzeko azterketa batzuek; hauek ere urte esanguratsu gehienok XX. mendearen bigarren erdialdean kokatzen dituzte. Azken urteetan gero eta sarriagoa gertatzen ari den klima aldakor hau Europa osoko laborategi askok hauteman dute, eta arrazoiak aztertzen hasiko ez garen arren, klima aldaketari buruzko teoriak berresten direla ematen du.